എന്റെ പ്രിയപ്പെട്ട നീ

കവിത

ഷിവിനാ വിക്ടര്‍

.......................................

ഒരുമിച്ചു നാം പോയൊരിടവഴിയിലും

തേടുന്നു മൊട്ടിട്ട മുല്ലകള്‍ നമ്മെ

നീ ചേര്‍ത്തു പിടിച്ചാ കരങ്ങളിന്നു -

മെന്നില്‍ അടരാതെ പടര്‍ന്നിരിപ്പുണ്ടെന്നോ

ആരാരും കാണാതെ ചുംബിച്ച കണ്‍തട-

ങ്ങളിലിന്നു  ചുടു കണ്ണീര്‍ വറ്റാത്തതെന്തേ

നീ തഴുകി തലോടിയ  മുടിയിഴകള്‍ ഞാന്‍

ഇന്നു ചീകിയൊതുക്കാന്‍ മറക്കുന്നുവെന്നോ  

നീയന്നു മൂളിയാര്‍ദ്രമാം വരികളോരോന്നും

ഞാനെന്ന പൂവിന്റെ ഇതളുകളായ് തീര്‍ന്നിട്ടും

ആ വിരലുകളില്‍ തട്ടിത്തടഞ്ഞു ഞാന്‍

ചൊല്ലിയതൊക്കെയും മറന്നങ്ങു നീ പോയില്ലേ

അന്നെന്റെ അധരത്തില്‍ നീ തന്ന

ചെറു മുറിവുണങ്ങിയെന്നാകിലും

നീറുന്ന നിന്നോര്‍മ്മകള്‍ ഇന്നുമെന്‍

ഇടനെഞ്ചിലെ മായാത്ത അക്ഷരത്തെറ്റു തന്നെ !