വെയില് ഒരു പുഴയാണ്
രാവേറെച്ചെന്ന് വെയില്പ്പുഴ നീലക്കയമായ്ഉ റങ്ങുന്ന നേരത്ത്, കുളിച്ചീറന് മാറിയപെണ്ണിന്റെ ഉടലിന് വെയിലിന്റെ മണമായിരുന്നു. വെയില് അവളെ ചുംബിച്ചിരിയ്ക്കാം.
oridam
എഴുത്ത് : ശിവജ.കെ.നായര്
വെയില്
ഒരു പുഴയാണ്.
കാറ്റത്തെ കരിയിലയനക്കം
ഒഴുക്കിന്റെ ഒച്ചയാണ്.
നേര്ത്ത ഇലയനക്കങ്ങള്
ചെറുമീനുകളാണ്.
മരക്കൊമ്പുകളുലയുന്നത്
ചുഴികളും മലരികളുമാണ്.
കാടിനടിയിലെ
കീരിപ്പാച്ചിലുകള്
മുങ്ങാംകുഴികളും ,
പച്ചത്തണുപ്പിലെ
വെയില് മയക്കം
കരുമാലിക്കയത്തില്
പൂതമുറങ്ങുന്നതുമാണ്
വൃക്ഷനിബിഡമായ
ഇടങ്ങളില്
പുഴയ്ക്ക് കടലാഴമാണ്.
മരങ്ങളില്ലാത്തിടം
മണല്പ്പുറമാണ് .
കാറ്റിനവിടെ
കനല്ച്ചൂടാണ്.
ഇലകൊഴിഞ്ഞ മരങ്ങള്
വെയില് ചോര്ന്ന വെള്ളം
തളം കെട്ടിയ വീടുകളാണ്
കാറ്റിനോടും
വേനലൊഴുക്കിനോടും
മല്ലടിച്ച് പിടിച്ചു നിന്നൊരില ,
രണ്ടോ മൂന്നോ
പച്ച ഞരമ്പുകള്
മാത്രമുള്ളൊരു
പഴുത്തയില,
ഇന്നലെയും
ഞാന് കണ്ടതാണ്.
ഇന്നു പകലിലെപ്പോഴോ
അത്
വേനല്പ്പുഴയില്
വീണു പോയിരുന്നു !
രാവേറെച്ചെന്ന്
വെയില്പ്പുഴ
നീലക്കയമായ്
ഉറങ്ങുന്ന നേരത്ത്,
കുളിച്ചീറന് മാറിയ
പെണ്ണിന്റെ ഉടലിന്
വെയിലിന്റെ മണമായിരുന്നു.
വെയില് അവളെ
ചുംബിച്ചിരിയ്ക്കാം.
