പ്രണയച്ചിറകിലെ ഈയാം പാറ്റകൾ
oridam
0
ജയശ്രീ രാജേഷ്
മുംബൈ
..........................................
നീയെന്ന മഷിതൊട്ട്
ഞാനെന്റെ ഹൃദയത്തിൽ
കുറിച്ചിരുന്നതെല്ലാം
നിന്നിലേക്ക് മാത്രം നീളുന്ന വരികളായിരുന്നു
നിനക്ക് മാത്രം
വായിച്ചെടുക്കാനാകുന്ന
എന്നിലെ
മൊഴികളായിരുന്നു .
നിന്നിലുദിച്ച്
എന്നിലസ്തമിക്കുന്ന
എന്റെ സന്ധ്യകളിൽ
ചേക്കേറിയിരുന്ന
മൗനത്തിന്റെ
കുഞ്ഞാറ്റ കിളികൾക്ക്
സന്ധ്യയുടെ
വർണ്ണരാജിയിൽ
പ്രണയത്തിന്റെ
ആർദ്രരാഗം .
പാതി വഴിയിൽ
ദിശാ ഭംഗം വന്ന
എന്റെ കിനാവിന്റെ
നിലാവരമ്പത്ത്
കാത്തിരിപ്പിന്റെ
രാപ്പാടികൾ മൂളിയത്
പ്രണയത്തിന്റെ
നിലാ നൊമ്പരങ്ങൾ .
കാലം ചവിട്ടിമെതിച്ച
ഓർമ്മകളുടെ ഇരുണ്ട
ഇടനാഴികകളിൽ
നീയെന്ന വെളിച്ചത്തിലേക്ക്
അറിയാതെ
പാറിയെത്തുന്ന
എന്റെ പ്രണയത്തിൻ ഈയാംപാറ്റകൾക്ക്
യാഥാർത്ഥ്യങ്ങളുടെ
മൺ വിളക്കിൽ
ആത്മാഹുതി .....
