അല്ല പിന്നെ !!! (ആക്ഷേപഹാസ്യ രൂപകം)

രാജൻ കിണറ്റിങ്കര

സുഹാസിനി:  എന്താ ചേട്ടാ ഈ ലോക കേരള സഭ ?

ശശി.. ലോകം , കേരളം, സഭ ഇതിൽ ഏതിന്റെ അർത്ഥമാണ് നിനക്കറിയാത്തത് ?

സുഹാസിനി : ഹാർട്ട് അറ്റാക്ക് ഹൃദയാക്രമണമല്ലല്ലോ..  കടലാക്രമണം സീ അറ്റാക്ക് അല്ലല്ലോ . സീ സർജ്  അല്ലേ. വാക്കും അർത്ഥവും തമ്മിൽ വലിയ ബന്ധമൊന്നുമില്ല.

ശശി.. വ്യവസായികളും സംരഭകരും അടങ്ങുന്ന ലോകത്തിലെ പല കോണുകളിലുള്ള മലയാളികളുടെ കൂട്ടായ്മയാണ് അത്.

സുഹാസിനി :  അവരെന്താ ചെയ്യുന്നത് ?

ശശി.. അവർ കേരളത്തിൽ മുതൽ മുടക്കും, വ്യവസായങ്ങൾ തുടങ്ങും. അർഹരും യോഗ്യരുമായ ഒരു പാട് തൊഴിൽ രഹിതർക്ക് ജോലി കിട്ടും

സുഹാസിനി :  കുറെ അർഹരല്ലാത്തവർക്കും ജോലിയാകും.  കൊടി പിടിക്കാനും പടിക്കൽ കുത്തിയിരിക്കാനും.. അല്ല പിന്നെ !!